Qazaqstandyq boksshylar amerıkalyq ataqty bapkerge shapan syılady

NUR-SULTAN. QazAqparat – Kásipqoı boksta jeńilip kórmegen qazaqstandyq boksshylar Meıirim Nursultanov (13-0, 8KO) pen Madııar Áshkeev (13-0, 6KO) aty ańyzǵa aınalǵan bapker Freddı Roýchke syılyq jasady, dep habarlaıdy QazAqparat.

Sportshylar belgili tálimgerge qazaqtyń shapanyn syıǵa tartty.

«Freddıdi týǵan kúnimen quttyqtap keldik», - dep jazdy M.Nursultanov Instagram-paraqshasynda.

Eske salaıyq, qazaqstandyq boksshylar Freddı Roýchtyń zalynda kelesi jekpe-jekterine uzaq ýaqyttan beri daıyndalyp keledi.

Frederık Stıven Roých – amerıkalyq kásipqoı boksshy, bapker. Álemdik boks tarıhyndaǵy eń myqty jattyqtyrýshylardyń biri. Boks týraly jazatyn Jýrnalıster qaýymdastyǵynyń nusqasy boıynsha 7 ret «Jyldyń úzdik bapkeri» atanǵan. Roých kóptegen belgili sportshylarmen jumys istegen. Úlken jetistikke ol fılıppındik Mennı Pakıaomen jetti.

Meıirim Nursultanov sońǵy aıqasyn AQSh-tyń Las-Vegas qalasynda 2019 jyldyń qarashasynda ótkizdi. WBC (USNBC) nusqasy boıynsha orta salmaqtaǵy AQSh chempıony ataǵy úshin jekpe-jektegi onyń qarsylasy meksıkalyq Krıstıan Olıvas (16-6, 13 KO) boldy. Tóreshiler biraýyzdy sheshimmen jeńisti qazaqstandyq boksshyǵa berdi. Keshtiń basty aıqasy reseılik Sergeı Kovalev pen (34-4-1, 29 KO) meksıkalyq Saýl «Kanelo» Alvarestiń (53-1-2, 36 KO) arasynda ótti.

Madııar Áshkeev bolsa, ótken jyldyń qarashasynda Amerıkanyń Gavaıan Gardens qalasynda 37 jastaǵy argentınalyq Rodolfo Ezıkel Martınesti (43-8-3, 16 KO) jeńip, alǵashqy tıtýly – WBC (UNSBC) tujyrymy boıynsha jartylaı orta salmaqta bos turǵan AQSh chempıony ataǵyna ıe boldy.