Qazaqstandyq boksshylar álemde alǵash bolyp ulttyq chempıonatta shlemsiz sharshy alańǵa shyqpaq
ASTANA. 22 qarasha. QazAqparat - Astanada bokstan eresekter arasynda Qazaqstan ulttyq chempıonaty bastaldy.
Onyń basty ereksheligi -jekpe-jek barysynda boksshylar arnaıy shlemsiz judyryqtasady. Chempıonat bastalar aldynda arnaıy baspasóz máslıhatynda tanymal boksshymyz, QR Boks federatsııasynyń vıtse-prezıdenti Serik Qonaqbaev jınalǵan tilshiler aldynda jańa erejeler jaıynda óz pikirin ortaǵa saldy.
«Qazaqstan boks federatsııasynyń jáne onyń tóraǵasy Tımýr Qulybaevtyń jeke bastamasyna senbeıtinder kóp bolǵandyqtan, odan shyǵatyn zardaptardy bilgileri keledi. Kóbi alańda sportshylardyń jaraqat alýy jıilep, qabaq jarý kóbeıedi jáne boks tipti qyzyqsyz bolady degen ýáj keltirýde. Alaıda men burynǵy boksshy retinde aıtarym: shlemsiz boks delebeni qozdyryp, jekpe-jekterdiń kórigin qyzdyratyn bolady», - deıdi S.Qonaqbaev.
«Árbir boksshyda ózin-ózi qorǵaý sezimi qalyptasady, qımyl órisiniń keńdigi paıda bolady. Jattyqtyrýshylar da boksty jaraqat az sport retinde qalyptastyrýdyń joldaryn oılaı bastaıdy. Bul da bizdiń jańashyldyǵymyzǵa úlken senimdilik beredi», - dedi ol.
Onyń aıtýynsha, jańa tóreshilik júıe de jasalǵan. Endi burynǵydaı kezdesýdi bes tóreshi emes, WSB nusqasynda qoldanylyp jatqan úsh tóreshi júıesi el chempıonatyna enedi.
«Bul tek bıyl Qazaqstanda júrgizilip otyrǵan reforma. Oǵan barlyq elderdiń federatsııalary men AIBA mamandary kóz tigip otyr. Synaq qalaı júzege asatyndyǵyn baǵalamaq úshin», - dep atap ótti vıtse-prezıdent.
S.Qonaqbaev sondaı-aq, aldaǵy jyly bul erejeler AIBA aıasynda barlyq elderge taralatyndyǵyn málim etti.
«AIBA-nyń jańa erejeleri retinde bul halyqaralyq týrnırlerge jáne ár eldiń ulttyq federatsııalaryna 2013 jyly engiziledi. Qazaqstandyq sportshylar álemde tuńǵysh ret rıngke jańa erejeler boıynsha shyǵady», - dep túıindedi sózin ol.
