Qazaqstandyq boksshy WBO ataǵy úshin bolǵan jekpe-jekte qarsylasyn nokaýtqa túsirdi

ALMATY. QazAqparat – Almatyda ótip jatqan MTK Kazakhstan boks keshinde qazaqstandyq Sultan Záýirbek (11-0, 7 KO) pen brıtanııalyq Raıan Ýıler (16-1-1, 0 KO) judyryqtasty, dep habarlaıdy QazAqparat Sports.kz saıtyna silteme jasap.

Ekinshi jartylaı salmaqtaǵy kezdesýde chempıondyq ataq sarapqa salynǵan bolatyn. Ol Sultan Záýirbektiń WBO European beldigi edi. Kezdesý 10 raýndqa eseptelgenimen, tórtinshi raýndta Ýıler eki ret nokdaýnǵa tústi. Altynshy raýndta qazaqstandyq boksshy qarsylasyn nokaýtqa jiberdi.

Osylaısha, Sultan Záýirbek kásibı bokstaǵy 12-shi jeńisine qol jetkizip, WBO beldigin sátti qorǵap qaldy. Al Ýıler kásibı boksta ekinshi ret jeńildi.

Búgin boks keshiniń basty kezdesýinde qazaqstandyq aýyr salmaqtaǵy boksshy Qamshybek Qońqabaev pen (3-0, 3 KO) brıtanııalyq Stıven Ýord (13-1, 4 KO) kezdesedi. Olar bos turǵan krýzerveıttegi WBA Gold chempıony ataǵy úshin judyryqtasady.