Qazaqstandyq boksshy Temirtas Júsipov Galledegi «Chemistry Cup» týrnıriniń alǵashqy fınalısi boldy
ASTANA. QazAqparat - Qazaqstandyq boksshy Temirtas Júsipov 49 kelige deıingi salmaq sanatynda Galle qalasyndaǵy (Germanııa) «Chemistry Cup» halyqaralyq týrnıriniń alǵashqy fınalısi boldy, dep habarlady Qazaqstandyq boks federatsııasynyń baspasóz qyzmeti.
Búgin jartylaı fınalda Temirtas Júsipov túrik sportshysy Tolgan Óztúrikti 3:0 esebimen aıqyn basymdylyqpen jeńdi. Júsipov týrnırdegi alǵashqy jekpe-jeginde de barlyq úsh tóreshiniń sheshimimen jeńiske jetken bolatyn. Erteń fınalda Temirtas Ońtústik Koreıa boksshysy Dongýn Shınmen kezdesedi.
Búgin Astana ýaqytymen túnde «Chemistry Cup» týrnırinde bizdiń taǵy úsh otandasymyz rıngke shyǵady. Ádilbek Nııazymbetov (81 keli) Germanııadan Serga Mıhelmen, Іlııas Súleımenov (52 keli) reseılik Vasılıı Vetkınmen, al Berik Ábdirahmanov (60 keli) Germanııa ókili Robert Arýtıýnıanmen judyryqtasady.
