Qazaqstandyq boksshy tájirıbeli qarsylasynan basym tústi

ASTANA. QazAqparat - Qazaqstandyq boksshy Musa Tursynǵalıev (7-0, 6 KO) kásipqoı rıngtegi segizinshi jekpe-jegin ótkizdi, dep habarlaıdy Sports.kz.

Ol Gollıvýdtaǵy (AQSh, Kalıfornııa shtaty) Seminole Hard Rock Hotel and Casino oıyn-saýyq kesheninde ótken boks keshine qatysty.

Tursynǵalıevtiń qarsylasy - 37 jastaǵy tájirıbeli kolýmbııalyq boksshy Deıvı Hýlıo Bassa (20-5, 12 KO) bolatyn. On raýndqa sozylǵan kezdesýde tóreshiler biraýyzdan Musany jeńimpaz dep tanydy.

Qazaqstandyq sportshy osylaısha kásipqoı alańdaǵy segizinshi jeńisine qol jetkizse, onyń qarsylasy altynshy ret jeńiliske ushyrap otyr. 

Aıta keteıik, bul - Tursynǵalıevtiń AQSh-taǵy ekinshi jekpe-jegi. Buǵan deıingi aıqasta ol domınıkandyq Lýıs Inohosany (31-15, 18 KO) tize búktirip, jartylaı jeńil salmaqta bos turǵan IBF «jastar» belbeýi men WBA NABA tıtýlyn ıelengen bolatyn.