Qazaqstandyq boksshy Sadrıddın Ahmedov WBA álemdik reıtıngisinde TOP-15-ke endi
NUR-SULTAN. QazAqparat – Jeńilip kórmegen birinshi orta salmaqtaǵy qazaqstandyq boksshy Sadrıddın Ahmedov (12-0, 11 KO) Dúnıejúzilik boks qaýymdastyǵynyń (WBA) jańartylǵan reıtınginde óz ornyn jaqsartty, dep habarlaıdy QazAqparat Sports.kz-ke silteme jasap.
Sadrıddın Ahmedov dıvızıondaǵy úzdik 15 boksshynyń qataryna kirip, tizimde 15-shi oryndy ıelendi. Reıtınginiń kóshbasshysy Ózbekstan ókili Israıl Madrımov (6-0, 5 KO).
Bul salmaqtaǵy WBA tıtýldaryn «sýper chempıon» amerıkalyq Djermell Charlo (34-1, 18 KO), álem chempıony, kýbalyq boksshy Erıslandı Lara (27-3-3, 15 KO) jáne frantsýz boksshysy «altyn» chempıon Mıshel Soro (35-2-1, 24 KO) ıelenedi.
Eske sala keteıik, qazaqstandyq Sadrıddın Ahmedov óziniń sońǵy jekpe-jegin 29 qańtarda ótkizdi. Ol on raýndtyń qorytyndysy boıynsha gollandtyq Stıven Danony (17-4-3, 6 KO) tóreshilerdiń biraýyzdan shyǵarǵan sheshimimen jeńdi.
