Qazaqstandyq boksshy Rýslan Myrsataev kásipqoı rıngte óziniń alǵashqy saıysyn jeńispen aıaqtady
ALMATY. QazAqparat- Búgin Almatyda Royal Tulip qonaq úıinde ótken kásipqoı boks keshinde Qazaqstan, Reseı jáne Grýzııadan 12 boksshy óner kórsetti.
Alǵashqy saıysta 69 keli 850 gramm salmaq dárejesinde sharshy alańǵa qazaqstandyq boksshy Berikbaı Nurymbetov pen grýzııalyq Aleksandr Benıdze shyqty. Tórt raýndqa sozylǵan saıys nátıjesi boıynsha (26-40, 36-40, 37-39) upaı sanymen qazaqstandyq bylǵary qolǵap sheberi jeńiske jetti. Ekinshi saıysta 55 keli 340 gramm salmaq dárejesinde búgin 23 jasqa tolǵan reseılik qandasymyz Erjan Zalılov (Kókshetaý qalasynyń týmasy) qazaqstandyq Nursultan Qabylovpen kezdesken bolatyn. Ekinshi raýndta jerlesimiz baýyrynan soqqy alyp, nokdaýnǵa túsip qaldy. Úshinshi raýndta sol jaq qulaq shekesinen taǵy bir aýyr soqqy jiberip alǵan jerlesimiz ekinshi ret nokdaýn aldy. Sońǵy raýndta taǵy da nokdaýnǵa túsken soń, tóreshi dárigermen aqyldasa kele saıysty toqtatty. Osylaısha, reseılik boksshy Erjan Zalılov tehnıkalyq nokaýtpen jeńiske jetti. Úshinshi saıysta 61 keli 230 gramm salmaq dárejesinde otandasymyz Azamat Núrkeev reseılik Aleksandr Podolskıımen qolǵap túıistirdi. Alty raýndqa sozylǵan boks dodasy asa tartysty bastaldy. Degenmen, reseılik boksshy úshinshi raýndta tehnıkalyq nokaýtpen jeńiske jetti. Azamat murnynan jaraqat alyp qaldy.
Tórtinshi kezdesý 72 keli 570 gramm salmaq dárejesi boıynsha qazaqstandyq boksshylar Temirlan Raıymqulov pen Artem Botsýnovpen arasynda ótti. Alty raýndtyq saıysta upaı sanymen (57-57, 56-57,59 55) eki boksshy da teń óner kórsetti dep jarııa etildi.
Besinshi saıysta osy salmaq dárejesinde qazaqstandyq Aıdos Erbosynuly reseılik Dmıtrıı Antıpovpen qolǵap túıistirgen bolatyn. Otandasymyz birinshi raýndtyń 1 mınýt 56-shy sekýndynda qarsylasyn baýyrdan uryp, nokaýtqa jiberdi.
Búgingi keshtiń eń sońǵy jáne basty saıysynda eń aýyr salmaq dárejesi boıynsha belgili qazaqstandyq boksshy Rýslan Myrsataev alǵashqy ret kásipqoı rıngte reseılik bylǵary qolǵap sheberi Valerıı Zamıralovpen kezdesti. Aıta ketelik, tarazyǵa ólshený barysynda reseılik boksshy qazaqstandyq qarsylasynan 18 kelige aýyr bolǵan edi.
Otandasymyz birinshi raýndta tehnıkalyq nokaýtpen jeńdi. Saıys bar bolǵany 2 mınýt 38-shi sekýndqa ǵana sozyldy.
Aıta ketelik, boks dodasyn kórýge kelgen 600-den astam kórermen boksshylarǵa qyzý qoldaý kórsetip otyrdy.
Boks keshin uıymdastyrýshylar - Qazaqstannyń kásipqoı boks federatsııasy men «BM Global» jáne Diamond Ring JShS.
