Qazaqstandyq boksshy Rýslan Mádıev amerıkandyq Karlos Sanchesti nokaýtqa jiberdi
ASTANA. QazAqparat - Qazaqstandyq kásipqoı boksshy, GGG komandasynyń múshesi Rýslan Mádıev kezekti reıtıngtik jekpe-jeginde óz qarsylasy - amerıkandyq Karlos Sanchesti nokaýtqa túsirdi.
Bul týraly GGG-diń VKontakte áleýmettik jelisindegi paraqshasynda habarlandy.
Jekpe-jek Kalıfornııada kýbalyq Maıkl Peres pen amerıkandyq Darnell Ýılsonnyń aldyndaǵy jekpe-jekke oraılastyrylǵan boks keshiniń aıasynda ótti. Rýslan birinshi raýndta-aq qarsylasyn esinen tandyrdy.
Jas ári bolashaǵynan úmit kúttiretin qazaqstandyq sportshy úshin bul aıqas kásibı bokstaǵy úshinshi kezdesýi.
Esterińizge sala keteıik, Rýslan Abel Sanchestiń qaramaǵynda aqpannyń 21-i kúni Monakoda Martın Mıýrreıge qarsy jekpe-jegin ótkizetin Gennadıı Golovkınmen birge jattyǵyp júr.
