Qazaqstandyq boksshy Roman Jaılaýov Avstralııada chempıondyq tıtýlǵa talasady
ASTANA. QazAqparat - Qazaqstandyq jas boksshy Roman Jaılaýov 5 shildede Avstralııada óziniń kezekti jekpe-jegin avstralııalyq Kemeron Hammondpen ótkizedi. Bul týraly Eýrazııalyq-Tynyq muhıty boks keńesiniń (EPBC) resmı saıtynda habarlandy.
10 raýndtyq dodada WBC nusqasy boıynsha jartylaı orta salmaq dárejesinde EPBC chempıony tıtýly tigilip otyr. Atap aıtqanda, qos boksshy da kásibı sharshy alańda jeńilip kórmegen. Qazaqstandyq boksshy 12 jekpe-jekti jeńip, onyń 8-in nokaýtpen aıaqtasa, K.Hammon 9-ynda úzdik atanyp, tórteýin merzimen buryn támamdady. Aıta keteıik, Roman Jaılaýov elordalyq boks mektebiniń tálimgeri, sport sheberine kandıdat. Ótken jylǵy mamyrda ol Azııa chempıony tıtýlyn jeńip aldy. Ár jyldary bokstan Qazaqstannyń birinshilikterinde kúmis júldeger jáne chempıon atanyp júrdi.
