Qazaqstandyq boksshy Olımpıadanyń jetinshi joldamasyn jeńip aldy

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde erler quramasy qazaq qorjynyna jetinshi lıtsenzııany saldy, dep habarlaıdy QazAqparat tilshisi.

57 kelige deıingi salmaqta synǵa túsken qazaqstandyq boksshy Serik Temirjanov shırek fınalda ırandyq Danıal Shahbahty merziminen buryn utyp, Tokıo Olımpıadasna joldamany jeńip aldy.

Osylaısha Ǵalymbek Kenjebaev Iordanııanyń Amman qalasyna senim artyp alyp barǵan 8 salmaqtan 8 boksshynyń jeteýi Tokıo Olımpıadasyna joldamany jeńip aldy.

Esterińizge sala keteıik, osyǵan deıin bokstan ulttyq quramanyń boksshylarynan 69 keli salmaqta Abylaıhan Júsipov, 81 keli salmaqta Bekzat Nurdáýletov, 91 keli salmaqta Vasılıı Levıt, 75 keli salmaqta Ábilhan Amanqul, asa aýyr salmaqta (+91) el namysyn qorǵap jatqan Qamshybek Qońqabaev jáne 63 kelige deıingi salmaqta synǵa túsken qazaqstandyq boksshy Zákir Safıýllın Olımpıada oıyndaryna joldama jeńip alǵan bolatyn.

Mine, jetinshi boksshy bolyp, Serik Temirjanov ta Tokıoǵa lıtsenzııa utyp aldy.

Qazaq boksshylary arasynan tek qana 52 kelige deıingi salmaqtaǵy Sáken Bıbosynov shırek fınalda Qytaılyq qarsylasyna jol berip, Olımpıada lıtsenzııasynan tys qaldy.

Sondaı-aq, áıelder boksynan 75 kelide el namysyn qorǵaǵan Nadejda Rıabets aımaqtyq Olımpıadaǵa irikteý týrnırinde Qazaqstan áıelder komandasynan jalǵyz joldamaǵa ıelik etti.

Sonymen qazaq boksshylary atalǵan olımpıadalyq irikteý týrnırinen erler arasynda 7, áıelder boksynan 1, jalpy 8 joldama jeńip aldy.