Qazaqstandyq boksshy qyzdar Polshada 6 medal aldy
ASTANA. QazAqparat - Polshanyń Glıvıtse qalasynda bokstan áıelder arasyndaǵy HІІ Sılezııa chempıonaty halyqaralyq týrnıri óz máresine jetti, dep habarlaıdy QBF baspasóz qyzmeti.
Eýropadaǵy iri áıelder jarystarynyń birine Qazaqstan atynan 13 sportshy qyz, sonyń ishinde ulttyq quramanyń betke ustar sportshylar - eki dúrkin álem chempıony Nazym Qyzaıbaı, Olımpıada júldegeri Darıǵa Shákimova, álem chempıondary Dına Jolaman, Lázzat Kúngeıbaeva jáne Valentına Halzovalar qatysqan.
Olar 19 elden 100-den astam sportshy beldesken týrnırde Eýropa jáne basqa qurlyqtardyń eń myqty boksshy qyzdarymen jekpe-jekke shyqty.
5 kúnge sozylǵan jarys qorytyndysy boıynsha, Madına Nurshaeva (64 kg) altyn medal ıegeri atansa, Nazym Qyzaıbaı (51 kg) fınalda ese jiberip, kúmispen shektelgen. Al Farıza Sholtaı, Lázzat Kúngeıbaeva, Móldir Bazarbaeva jáne Jaına Shekerbekovalar qurama qorjynyna tórt qola medaldy salǵan.
