Qazaqstandyq boksshy qyz halyqaralyq týrnırde top jardy
KÓKShETAÝ. QazAqparat - Aqmolalyq bylǵary qolǵap sheberi Dına Jolaman Serbııada ótken halyqaralyq týrnırde top jardy, dep habarlaıdy QazAqparat tilshisi.
Aqmola oblysynyń dene shynyqtyrý jáne sport basqarmasy habarlaǵandaı, jarysqa 20 elden 144 sportshy qatysqan.
Qazaqstan quramasy sapynda eresekter men jastar jáne jasóspirimder qatysty. Onyń ishinde aqmolalyq boksshy qyzdar Dına Jolaman men Móldir Bazarbaeva jaqsy óner kórsetti.
«54 keli salmaqtaǵylar arasynda Dına frantsýzdyq Sıntıı Loverjondy tóreshilerdiń biraýyzdan shyǵarǵan sheshimimen jeńip, týrnır chempıony atandy. Al 81 keli salmaqtaǵylar arasynda synǵa túsken Móldir Bazarbaeva qola júldege ıe boldy», - deıdi Aqmola oblysynyń dene shynyqtyrý jáne sport basqarmasy baspasóz qyzmetiniń hatshysy Mahabbat Bolshına.
Vedomstvo keltirgen málimetterge qaraǵanda, Qazaqstannyń áıelder quramasy qorjynǵa 11 medal (5 altyn, 1 kúmis jáne 5 qola) salyp, jalpy komandalyq esepte birinshi oryn ıelendi. Al, ekinshi jáne úshinshi oryndardy Reseı jáne Serbııa quramalary ózara bólisti.
Osyǵan deıin, jastar men jasóspirimderdiń arasynda qyzdar komandalary jalpy komandalyq esepte birinshi oryn alyp, týrnırdiń Sýper kýbogynyń ıegeri atandy.
