Qazaqstandyq boksshy qarsylasyn 38 sekýndta utty
ASTANA. QazAqparat - Qazaqstandyq boksshy Bekman Soılybaev kásibı mansabyndaǵy besinshi jeńisine qol jetkizdi, dep habarlaıdy «Alaman» portaly.
24 jastaǵy Soılybaevtyń qarsylasy meksıkalyq Serhıo Naher boldy. Gong estilisimen-aq, shabýylǵa kóshken jerlesimiz úzdiksiz soqqylap, qysym kórsetken. Osynyń arqasynda qarsylasynyń ashyq qalǵan tusynan aýyr soqqy jumsady. Mundaı qysymǵa shydamaǵan meksıkalyq esinen aıyrylyp qulaıdy. Al tóreshi kezdesýdiń nebári 38-shi sekýndynda jekpe-jekti aıaqtaýǵa májbúr boldy.
Bul jeńis - Soılybaevtyń kásibı mansabyndaǵy ýaqytynan erte aıaqtaǵan úshinshi jekpe-jegi. Al Serhıo Naher óziniń 20-shy jeńilisine ushyrady (10 jeńis, 2 teń kezdesý).
Jekpe-jek Kalıfornııa shtatyndaǵy Chıno qalasynda kásibı boksshylar shoýy kezdesýiniń aıasynda ótti.
