Qazaqstandyq boksshy Ivan Dychko Álem chempıonatynyń fınalynda judyryqtasatyn boldy
ASTANA. QazAqparat - Dohada bokstan ótip jatqan álem chempıonatynyń jartylaı fınalynda qazaqstandyq boksshy Ivan Dychko 91 keliden astam salmaqta ózinen tórt jas kishi, 21 jasar ózbekstandyq Bahodır Djalolovpen kúsh synasty.
Ivan Dychko bul básekede sabyrly da saýatty qımyldap, tájirıbesiniń de, sheberliginiń de basym ekendigin kórsete bildi. Bıylǵy Azııa chempıonatynyń shırek fınalynda I.Dychko osy B.Djalolovty 3:0 esebimen tize búktirgen bolatyn. Bul - ekinshi jeńisi. Osyǵan deıingi eki álem birinshiliginde I.Dychko qos medal (bir qola, bir kúmis) ıelengen edi. Endi, mine, taǵy bir fınalǵa shyǵyp otyr. Alda - frantsııalyq Tonı Iokamen altyn júlde úshin aıqas ári sýpersalmaqta álem chempıony ǵana Olımpıada joldamasyna qol jetkizetin bolady. Aıta keteıik, budan buryn 69 keli salmaqta Qazaqstan quramasynyń kapıtany Danııar Eleýsinov ázerbaıjandyq Parvız Bagırovty aıqyn basymdylyqpen utyp, fınalǵa shyǵýmen birge Olımpıada joldamasyn utyp aldy. Ol sońǵy básekede marokkolyq boksshy Mohammad Rabıımen kúsh synasady. Osy álem chempıonatyna deıin-aq olımpıada joldamasyn ıelengen M.Rabıı dúnıejúzilik reıtıngte Danııardan keıin ekinshi orynda tur. Demek, osal qarsylas emes. Batys Qazaqstan boksynyń túlegi D.Eleýsinov fınalda marokkolyqty utsa, Olımpıada chempıony Serik Sápıev sekildi álem birinshiliginiń eki dúrkin jeńimpazy atanatyn bolady. Sóıtip Doha chempıonatynyń fınalynda Qazaqstannan qos boksshy synǵa túspek. Basqalary júldeden tys qaldy.
