Qazaqstandyq boksshy Golovkınniń salmaǵynda alǵashqy jekpe-jegin ótkizbek

ASTANA. QazAqparat - Qazaqstandyq kásipqoı boksshy Sadrıddın Ahmedov (3-0, 3 KO) 7 qyrkúıek kúni Kanadanyń Edmonton qalasynda jekpe-jek ótkizedi, dep habarlaıdy Sports.kz.

Onda jerlesimiz argentınalyq Brýno Leonardo Romaımen (21-5, 18 KO) bokstaspaq. BoxRec.com taratqan aqparatqa sensek, bul joly Ahmedov alǵash ret orta salmaq sanatynda ózin baıqaıdy. Burynǵy jekpe-jekterin Sadrıddın birinshi orta salmaqta ótkizgen bolatyn.

Buryn Ahmedov taǵy bir qazaqstandyq boksshy Nurzat Sabyrovpen (7-0, 6 KO) birge 13 qazanda Monrealda jekpe-jek ótkizetini habarlanǵan bolatyn. Biraq Monrealda olarǵa kimder qarsylas bolatyny ázirge belgisiz.

Aıta keteıik, Romaıǵa qazaqstandyq boksshylardyń pármeni belgili. 2017 jyldyń qyrkúıeginde ol Janqosh Turarovpen kezdesken edi. Tóreshiler biraýyzdan jeńisti Janqoshqa bergen soń, Romaı rıngten ketip qalǵan edi.