Qazaqstandyq boksshy Demıanenko 21-inshi jeńisine qol jetkizdi
ASTANA. 12 qazan. QazAqparat - Beısenbi kúni keshkilik orta salmaqtaǵy qazaqstandyq kásipqoı boksshy Vıtalıı Demıanenko óziniń kezekti jeńisine qol jetkizip, asa tájirıbeli meksıkalyq Roberto Valensýelany tize búktirdi.
Sóıtip, qazylardyń sheshimi boıynsha buǵan deıin jeńilip kórmegen jerlesimiz 21-inshi ret óziniń myqty ekenin dáleldedi. Bul týraly «Astana Sport» sporttyq basylymy Fightnews.com. saıtyna silteme jasap habarlady.
Jekpe-jek AQSh-tyń Oklahoma shtatynda «Remington Park Racing Casino»-da ótken bolatyn.
Demıanenko Valensýeladan salmaǵy birshama jeńildeý bolatyn. Degenmen, jerlesimiz birinshi raýndta-aq jekpe-jekti óz yńǵaıyna aınaldyryp, aýyr kombınatsııalar arqyly qarsylasyn soqqydan kóz ashtyrmady. Boks berilgen 6 raýnd boıy ótkenimen, ákki bylǵary qolǵap sheberi sanalatyn Valensýela qazaqstandyq sportshyǵa qarsy eshteńe óndire almady, kerisinshe ol Vıtalııdiń shabýylynan qorǵanýmen ǵana júrdi. Osyǵan oraı qazylardyń bári biraýyzdan 60 - 54 esebimen jeńisti jerlesimizge bergen bolatyn.
«Men ózimdi tejeýsiz sezinemin, jáne alǵa júrýge daıynmyn» - deıdi Vıtalıı óziniń promoýterleriniń «Boxing360» saıtynda. Saıttyń habarlaýynsha, qazaqstandyq boksshy rıngke jaqyn aralyqta taǵy kóteriletin bolady.
