Qazaqstandyq boksshy Brandenbýrg kýbogy týrnırinde qola júldeger atandy
ORAL. QazAqparat - Sportqa daryndy balalarǵa arnalǵan mamandandyrylǵan oblystyq mektep-ınternatynyń shákirti Nursultan Nurıdenov Germanııanyń Oderdegi Frankfýrt qalasynda jastar arasynda bokstan dástúrli Brandenbýrg kýbogy týrnırinde qola júldeger atandy, dep habarlaıdy «QazAqparat» tilshisi.
Atalmysh mektepten túsken málimetke qaraǵanda, álemniń 38 elinen jas boksshylar qatysqan dodada Nursultan 49 keli salmaqta júldege ilikti. Onyń jattyqtyrýshylary - Ernar Nurıdenov pen Erjan Qıyndyqov.
Bul - Nursultannyń halyqaralyq jarystarda alǵan birinshi júldesi emes. Mysaly, ol ótken jyly Máskeý túbindegi Ivanteevka qalasynda Reseıdiń eńbek sińirgen jattyqtyrýshysy Nıkolaı Hromovtyń júldesi úshin bokstan ótken HV ashyq búkilreseılik týrnırde qola júldege qol jetkizgen bolatyn.
Aıta keteıik, kezinde Brandenbýrg kýbogy týrnırine Gennadıı Golovkın, Danııar Eleýsinov, Ivan Dychkolar qatysyp, jeńimpaz atanǵan edi.
