Qazaqstandyq boksshy Bolgarııadaǵy týrnırdiń chempıony atandy
ASTANA. QazAqparat - Bolgarııa astanasy Sofııa qalasynda ótken «Strandja Memorıaly» 69-shy halyqaralyq týrnırinde qazaqstandyq komanda bir altyn, tórt qola medal jeńip aldy, dep habarlaıdy QazAqparat Qazaqstannyń boks federatsııasyna silteme jasap.
Týrnırge 31 eldiń boksshylary, sonyń ishinde 10 qazaqstandyq qatysty.
64 kılogramǵa deıingi salmaq sanatynda ymyrasyz ótken aıqasta Aqmola oblysynyń 26 jastaǵy týmasy Sabyrjan Bekbergenov jeńimpaz boldy. Ol 4 kezdesý ótkizip, fınalda ýkraınalyq Ivan Danchany 5:0 esebimen jeńdi.
Qanaǵat Maralov, Nurbol Qaljanov, Mıhaıl Kohanchık jáne Abzal Quttybekovter qola medaldy ıelendi.
Qazaqstandyq tóreshi Aıdamır Eralıev Strandja týrnırindegi úzdik referı atandy.
Bokstan Qazaqstan ulttyq quramasy naýryz aıynyń basynda Eýropada taǵy eki týrnırge qatysady: onyń birinshisi 11-17 naýryz kúnderi Polshada Felıks Shtammdy eske alý týrnıri ótse, 8-12 naýryz kúnderi Fınlıandııada GeeBee týrnıri uıymdastyrylady.
