Qazaqstandyq boksshy Batyr Júkembaevtyń kezekti aıqasy qashan ótetini belgili boldy

NUR-SULTAN. QazAqparat - Qazaqstandyq nokaýtshy Batyr Júkembaevtyń (15-0, 12 KO) rıngke oralatyn kúni belgili boldy, dep habarlaıdy QazAqparat Sports.kz-ke silteme jasap.

Jeńilip kórmegen sportshy 17 mamyrda Monrealdaǵy (Kanada, Kvebek provıntsııasy) Montreal Casino-da ótetin boks keshiniń qatysýshylarynyń biri bolmaq. Qazaqstan ýaqyty boıynsha aıqas 18 mamyrda tańerteń ótedi. Júkembaevtyń qarsylasy ázirge belgisiz. Basty boks keshinde reseılik Arslanbek Mahmýdov (7-0, 7 KO) amerıkalyq boksshy Djonatan Raıspen (10-3-1, 6 KO) sýper aýyr salmaqtaǵy WBC International tıtýly úshin kúsh synaıdy.

Eske salaıyq, Batyr sońǵy jekpe-jegin 16 naýryzda osy arenada ótkizgen. Onda ol tóreshilerdiń sheshimimen meksıkalyq Hılberto Mesoıdy (10-6-1, 6 KO) jeńgen edi.