Qazaqstandyq boksshy áýesqoı MMA-da úsh dúrkin álem chempıony atandy
ÁBÝ-DABI. QazAqparat – Ábý-Dabı qalasynda MMA-dan álem chempıonaty aıaqtaldy. Álem birinshiligine 56 elden jınalǵan 421sportshy qatysty, dep habarlaıdy QazAqparat MMA-dan Qazaqstan birlesken federatsııasynyń baspasóz qyzmetine silteme jasap.
Týrnırge 18-21 jas aralyǵyndaǵy sportshylar (jastar) men 21 jastan asqan eresekter qatysty.
MMA álemindegi tarıhı oqıǵa aqtóbelik Baǵdat Jubanyshtyń (52,2 kelige deıin) het-trık jasaýy boldy. Aqtyq jekpe-jekte ol reseılik Farhod Rahmonalıevti jeńip, áýesqoı MMA-da alǵash ret úsh dúrkin álem chempıony atandy. Nebári úsh raýndtan turǵan jekpe-jekte qazaqstandyq boksshynyń basymdyǵy baıqaldy. Tóreshilerdiń biraýyzdan qabyldaǵan sheshimimen Jubanysh jeńiske jetti.
56,7 kelige deıingi salmaq dárejesinde Almaty oblysynyń ókili Dastan Jaqypbekov tóreshiler sheshimimen reseılik Bektur Jenıshıýek ýýlynan jeńilip qaldy.
Eresekter arasynda MMA-dan álem chempıonatyndaǵy ekinshi oryndy Bekzat Jasııa (Shymkent qalasy) jeńip alǵan. Ol 65,8 kelige deıingi salmaqta tóreshiler sheshimimen ıspandyq Hýan Izkýerdony utty.
Aqtyq jarysqa Qazaqstannan shyqqan jalǵyz boıjetken Aıjan Ábdiqadyr (Jambyl oblysy) boldy. 70,3 kelige deıingi salmaqta ol reseılik Olga Logodnaıaǵa ese jiberdi.
Sońǵy jekpe-jekte 120,2 keliden joǵary salmaq dárejesinde pavlodarlyq Rasýl Hataev reseılik Shamsýtdın Mahmýdovty tehnıkalyq nokaýtpen utty.
MMA-dan eresekter arasyndaǵy álem chempıonatynyń sońǵy kúniniń qorytyndysy boıynsha Qazaqstan quramasy tarıhta alǵash ret eki altyn medal jeńip aldy. Sondaı-aq qorjynda 3 «kúmis» jáne 6 «qola» júlde bar.
