Qazaqstandyq boksshy AQSh-ta jekpe-jek ótkizedi

ASTANA. QazAqparat – 2019 jylǵy áýesqoılar arasynda Azııa chempıony Bek Nurmaǵanbet kásibı deńgeıde kezekti aıqasyn ótkizedi, dep habarlaıdy QazAqparat Sports.kz-ke silteme jasap.

«Nurmaǵanbet 15 sáýirde Pomonda (AQSh, Kalıfornııa shtaty) 8-raýndtyq aıqas ótkizedi. Onyń qarsylasy venesýelalyq Eber Rondon (20-3, 13 KO) bolady», - dedi Suleimen Promotion promoýterlik kompanııasy.

25 jastaǵy Bek Nurmaǵanbet kásipqoı boksta 8 aıqasqa qatysyp, jeńiske jetken (6 ret nokaýtpen). Buǵan deıin ol ótken jyldyń qazanynda Mehıkoda jergilikti boksshy Lýsıano Chaparro Araýhomen kezdesip, ekinshi raýndta jeńdi. Eber Rondon 2021 jyly qazaqstandyq Tursynbaı Qulahmetten (4-1, 3 KO) nokaýtpen jeńilgen edi.