Qazaqstandyq bodıbılder Arnold Shvartseneggerdiń týrnırinde jeńiske jetti
ASTANA. QazAqparat - Qazaqstandyq bodıbılder Sergeı Sereşev alǵash ret «Arnold Classic Europe» pro-týrnırinde jeńiske jetip, amerıkalyq kýltýrıst, akter jáne saıasatker Arnold Shvartseneggerdiń qolynan 5 myń dollar syıaqy aldy, dep habarlaıdy QazAqparat.
QR Bodıbıldıng jáne fıtnes federatsııasynan málim etkendeı, almatylyq Sergeı Sereşev bodıbıldıngten kásipqoı dıvızıonnyń «Arnold Classic Europe 2018» týrnırinde «altyn» ıelengen alǵashqy qazaqstandyq atlet.
«Barselonada dástúrli túrde Arnold Shvartseneggerdiń brendimen bútin álem kýltýrısteriniń jarysy ótýde. Bıyl Qazaqstan quramasynan áýesqoı dıvızıonda - 12 sportshy jáne IFBB Elite Pro pro-kartasymen bir atlet synǵa túsýde», - delingen habarlamada.
Kásipqoı sportshylar arasynda barlyǵy 15 úzdik sportshy baq synady. Nátıjesinde, qazaqstandyq Sergeı Sereşev upaı sandarymen Germanııa jáne Ýkraınadan kelgen atletterdi basyp ozdy. 5 myń dollar kólemindegi aqshalaı marapatty Arnold Shvartseneggerdiń ózi tapsyrdy.
«Arnold Classic Europe 2018» týrnıriniń kásipqoılar arasyndaǵy jalpy júlde qory 60 myń AQSh dollaryn quraıdy.
