Qazaqstandyq bıznesmender búginin ǵana oılamaýy kerek - nemis sarapshy
«Germanııa ókili Ýlrıh Maıer Jambyl oblysyna «Bıznestiń jol kartasy-2020» baǵdaralamasy aıasynda kelgen», - dedi Jambyl oblystyq kásipkerler palatasynyń baspasóz hatshysy Shýhrat Hashımov.
Qazaqstandaǵy kásipkerliktiń damý deńgeıine qandaı baǵa beresiz degen suraqqa Ýlrıh Maıer ashyq jaýap berdi: «Eger sizder bıznestiń damýyn shynymen qoldaǵylaryńyz kelse, barlyq erejeni túbegeıli ózgertý qajet. Jalpy, Qazaqstandaǵy, sonyń ishinde Jambyl oblysyndaǵy bıznes salasynyń damýyna oń baǵa beremin», - dedi ol.
Sarapshynyń pikirinshe, Kásipkerler palatasy men basqa da memorgandar eldegi bıznes-klımatty jaqsartý úshin kóptegen jumystar júrgizip jatyr.
«Sizderdiń kásipkerlerińizge aıtar bir tilegim bar - olar baryn qanaǵat tutyp, bir kúnimen ómir súrmeýi kerek. Barlyǵy óz isiniń bolashaǵy úshin jumys isteýi kerek. Bızneste búgingi paıda nemese tabys bolmaýy kerek. Eger sizdiń isińiz bir jolǵa túsip, dál osyndaı úrdis jalǵasatyn bolsa, ol sizdiń damymaı qalǵanyńyzdy bildiredi. Ózin-ózi jetildirip, damyp, tek qana alǵa jylý kerek. Ekinshi másele -aýyldyq jerlerde jalaqynyń tómen bolýy. Eýropada aýyl sharýashylyǵy jumysshylary, basqa da salalardyń qyzmetkerleri aıtarlyqtaı kóp jalaqy alady, al bul týraly tek memleket qana emes, bıznesmender de oılanýy qajet», - dedi ol.
Ýlrıh Maıer nesıe berý máselesine de nazar aýdardy.
«Sizderdiń bankterińizdegi qoıylatyn protsenttik mólsherleme tym joǵary. Óz isterin bastaǵysy keletin nemese damytqysy keletin kásipkerler nesıeleýdi paıdalanbaıtyn bolady. Bul jerdegi basty sebep - jobanyń ekonomıkalyq tıimsizdigi nemese nesıeni tóleı almaýdan qorqýy. Eger kásipker nesıeleýdi qoldansa da, onyń barlyq tapqan tabysy ony tóleýge jumsalatyn bolady. Bul durys emes. Onyń aqshasy qalmaıdy jáne kásibin ary qaraı órkendetýge degen nıeti de ketip qalady. Sebebi, ol únemi bankten alǵan qaryzyn oılaıtyn bolady. Bul jerde qarjylyq ınstıtýttardyń qoldaýy aýadaı qajet», - dep túıindedi sheteldik sarapshy.
