Qazaqstandyq bıznes úshin Eýropalyq odaqpen birlesken birqatar shara uıymdastyrylady

ASTANA. QazAqparat – Indýstrııa jáne ınfraqurylymdyq damý mınıstrligi Qazaqstandaǵy Eýropalyq odaq ókildigimen birlesip, memlekettik organdar men bıznes ókilderiniń aýqymdy kezdesýlerin uıymdastyrýdy josparlap otyr, dep habarlaıdy QazAqparat.

Mınıstrlik málimetinshe, kezdesýler QR men EO arasynda asa qajetti shıkizatpen qamtamasyz etý salasyndaǵy memorandým sheńberinde uıymdastyrylady. Oǵan 100-den astam qazaqstandyq jáne eýropalyq kásiporyn qatysady dep kózdelgen.

Máselen, 1-3 shildede mınıstrlik ókilderi Óskemendegi metallýrgııa zaýyttaryna barsa, 4 shildede Astanada 27 qazaqstandyq jáne 22 eýropalyq kompanııanyń qatysýymen «Qazaqstan-Eýroodaq: asa qajetti shıkizat salasyndaǵy bıznes seriktestigi» forýmy ótkiziledi.

Sonymen qatar 13-17 qarashada Brıýssel qalasynda mańyzdy kezdesý ótkizý josparlanǵan. Bir aptaǵa jalǵasatyn is-sharany Eýropalyq komıssııa uıymdastyrady.

Al bıylǵy Raw Materials Week-te Qazaqstan men EO arasyndaǵy yntymaqtastyqty nyǵaıtýǵa arnalǵan arnaıy is-sharany uıymdastyrý mejelenip otyr. Onda 100-den astam salalyq bıznes kásiporynnyń ókilderi kezdespek.

«Aıta keteıik, qazaqstandyq sarapshylar eýropalyq kásiporyndardyń talaptary men qajettilikteri jónindegi aqparatqa meılinshe kóbirek ıe bolýy qajet. Sondyqtan da jańa birlesken jobalardy iske asyrýda mundaı kezdesýlerdiń paıdasy zor.

Tutastaı alǵanda, Qazaqstannyń ındýstrııalyq strategııasy qosylǵan quny joǵary ónim shyǵaryp, tehnologııalyq turǵyda damyǵan ónerkásipti qurýǵa baǵyttalǵanyn aıta ketken oryndy. Aıtalyq, óńdeý ónerkásibindegi óndiris kólemin 2029 jylǵa qaraı 1,5 esege ulǵaıtý kózdelip otyr.

Asa qajetti mıneraldardyń qataryna kobalt, magnıı, tantal, platına, palladıı, lıtıı, nıobıı, vanadıı jáne taǵy basqa elementter kiredi», - delingen mınıstrliktiń baspasóz dereginde.