Qazaqstandyq bıznes týraly úzdik materıal jarııalaǵan tilshiler marapattaldy

ASTANA. QazAqparat - «Qazmedıa» ortalyǵynda EAEO naryǵyndaǵy qazaqstandyq kásipkerlik pen «Bıznestiń jol kartasy-2020» baǵdarlamasy týraly úzdik materıal jarııalaǵan BAQ ókilderi arasyndaǵy jyl saıynǵy respýblıkalyq baıqaýdyń marapattaý rásimi ótkizildi, dep habarlaıdy QazAqparat tilshisi.

Baıqaýdy «Atameken» UKP uıymdastyryp otyr. Sarapshylar komıssııasy Qazaqstannyń túkpir-túkpirinen 300-ge tarta materıaldy qabyldaǵan. Baıqaýdyń jalpy qory - 2,28 mln teńge. Baıqaý tórt nomınatsııa boıynsha uıymdastyrylyp, tóreshiler 300 eńbektiń ishinen úzdik 16-syn tańdap alǵan. Birinshi oryn alǵandar 300 myń teńgege ıe bolsa, ekinshi oryn ıelengenderge 200 myń teńge, úshinshi oryn ıegerlerine 100 myń teńge tabystaldy.

Komıssııa músheleri atap ótkendeı, eńbekterdiń kóbi «Baspasóz betterindegi úzdik taldaý materıaldary» nomınatsııasy boıynsha usynylǵan. Baıqaýǵa Qazaqstannyń barlyq aımaqtarynan materıaldar kelip túsken. Uımydastyrýshylardyń aıtýynsha, baǵalaý kezinde ádil qazylar materıaldyń shynaıylyǵyna, jańashyldyǵyna, aıqyndylyǵy men aqparattyń senimdiligine, sonymen birge tilshiniń etıkalyq qaǵıdattaryna sáıkestigi esepke alynǵan.

«Mundaı baıqaýlar álbette kerek. Aımaqtyq tilshilerdiń de eńbegi baǵalanýy kerek. Jýrnalısterdiń jumysyn baǵalaıtyn komıssııa quramyna redaktorlar, belgili tilshiler endi», - deıdi qazylardyń tóraǵasy, pýblıtsıst Namazaly Omashev.