Qazaqstandyq bitimgershiler Batys Sahara men Kot-d'Ivýarda áskerı baıqaýshy qyzmetin atqarýda - E.Ydyrysov
ASTANA. QazAqparat - Qazirgi ýaqytta qazaqstandyq bitimgershiler álemdegi bitimgershilik operatsııalaryna qatysyp jatqan joq. Bul týraly búgin QR Prezıdenti janyndaǵy OKQ-de ótken brıfıngte QR Syrtqy ister mınıstri Erlan Ydyrysov aıtty.
«Qazaqstan Birikken Ulttar Uıymynyń múshesi retinde álemdegi bitimgershilik operatsııalaryn qoldaýǵa mindetti. Biraq, árbir memleket bitimgershilik operatsııalaryna qatysý jáne qoldaý tártibin ózi aıqyndaıdy. Aǵymdaǵy jyly Qazaqstan qabyldaǵan bitimgershilik qyzmet týraly zańda tártibi naqty jazylǵan», - dedi mınıstr.
Onyń atap ótýinshe, osy jyldary ishinde elimiz óziniń bitimgershilik áleýetin barynsha damytty. Qazaqstandyq bitimgershilerdiń mol tájirıbesi bar, daıyndyqtary da joǵary ári BUU-nyń bitimgershilik operatsııalaryna qatysýǵa daıyn.
Osy oraıda E.Ydyrysov qazaqstandyq áskerı ınjenerler Iraktaǵy bitimgershilik operatsııalaryna qatysyp, 5 mıllıon mınany zalalsyzdandyrǵanyn atap ótti.
«Qazirgi ýaqytta bizdiń bitimgershilerimiz álemdegi birde-bir bitimgershilik operatsııalaryna qatysyp otyrǵan joq. Bitimgershilik operatsııalary janyndaǵy áskerı baıqaý ınstıtýty bar. Biz áskerı baıqaýshylarymyzdyń qatysýǵa daıyn ekendigin jáne jibere alatyndyǵymyzdy aıttyq. Qazirgi ýaqytta bizdiń baıqaýshylar eki elde, atap aıtqanda, Batys Sahara men Kot-d'Ivýarda jumys isteýde. Olar qandaı da bir áskerı operatsııalarǵa qatyspaıdy, tek baıqaýshy qyzmetin júrgizedi», - dedi E.Ydyrysov.
