Qazaqstandyq bitimgerlerdi Donbasqa jiberý máselesi qaralyp jatqan joq – mınıstrlik
Búgin Ortalyq kommýnıkatsııalar qyzmeti alańynda ótken baspasóz máslıhaty barysynda tilshi «Eger ujymdyq qaýipsizdik shart týraly uıym (ODKB) Donbasqa áskerı bitimgerlerdi jiberý týraly sheshim qabyldasa, qazaqstandyq bitimgerler qatysa ma?», - degen saýal qoıdy. Tilshi saýalyna Qorǵanys mınıstriniń orynbasary, general-leıtenant Sultan Kamaletdınov jaýap berdi.
«Geosaıası jaǵdaıǵa baılanysty atalǵan másele barsha qazaqstandyqtardy alańdatyp otyrǵan sekildi. Aıta ketetin jaıt, qazaqstandyq Qarýly kúshterdiń elden tys jerdegi sharalarǵa qatysýy týraly aldyn ala jazylyp, normaǵa saı bekitilgen. Qarýly kúshterdiń bitimgerlik operatsııalarǵa qatysýy tek BUU Qaýipsizdik keńesiniń rezolıýtsııasy boıynsha ǵana júzege asyrylady», - dedi Sultan Kamaletdınov.
Onyń aıtýynsha, BUU rezolıýtsııa jarııalaǵan jaǵdaıdyń ózinde másele aldymen el ishinde talqyǵa salynady.
«Memleket basshysy rezolıýtsııany negizge ala otyryp, máseleni Parlamenttiń aldyna shyǵarady. Eger Parlament bekitse, onda áskerı bitimgerlerdi qatystyrý sheshimi qabyldanýy múmkin. Degenmen, qazir Donbasqa áskerı bitimgerler jiberý máselesi qaralyp jatqan joq. Eshqandaı kelisim nemese kelissóz de júrip jatqan joq», - deıdi ol.
Buǵan deıin mınıstrdiń orynbasary Qazaqstanda áskerı patrıottyq tárbıe berýdiń jańa aktisi qabyldanatynyn aıtty.
Odan bólek, mınıstrlik áskerı mindetin ótegenderdi memlekettik organdarǵa jumysqa ornalastyrmaq.
