Qazaqstandyq bıshiler World Folk Vision-2020 baıqaýynda ekinshi oryn ıelendi
NUR-SULTAN. QazAqparat – Qazaq ulttyq horeografııa akademııasynyń stýdentteri jahandyq «World Folk Vision-2020» ulttyq mádenıetter festıvalinde 2-shi oryn ıelendi, dep habarlaıdy QazAqparat tilshisi.
Qazaqstannyń ókilder halyqtyń daýsynyń jáne halyqaralyq kásibı qazylar alqasynyń sheshimi boıynsha jeńimpaz retinde tanyldy. Akademııanyń shákirtteri baıqaýda «Álem halyqtarynyń bıleri» baǵyty boıynsha «Aqqýlar» kompozııasyn tanystyrdy.
Festıvalge jalpy álem elderinen 3950 shyǵarmashylyq ujym men jeke bıshi qatysty. Halyqaralyq irikteý barysynda fınalǵa 60 eldiń 100 qatysýshysy jetti. Mundaǵy syılyq qatysýshylarǵa Búkilálemdik «World Folk Vision» mádenı bastamasy boıynsha álemniń túrli elderindegi mádenı sharalarǵa qatysýǵa múmkindik beredi.
World Folk Vision-2020 – mádenıettiń, óner men sporttyń kásipqoılary men áýesqoılaryn biriktiretin iri halyqaralyq gýmanıtarlyq joba. Bıyl festıval BUU Jahandyq kelisiminiń 20 jyldyǵy men Jahandyq Mádenı Bastamany júzege asyrý aıasynda ótkizildi. Festıval – bı álemindegi iri sharanyń biri. Bıyl koronavırýs pandemııasyna baılanysty baıqaý tuńǵysh ret onlaın formatta ótkizilip otyr.
