Qazaqstandyq bıshiler 7-shi Búkilálemdik bı olımpıadasynda úzdik atandy
ASTANA. Mamyrdyń 14-i. QazAqparat /Jasulan Amanbaıuly/ - Máskeý qalasynda ótken 7-shi Búkilálemdik bı olımpıadasynda Qazaqstan namysyn qorǵaǵan «Alekseı Velıjanınniń bı teatry» bir altyn, eki kúmis jáne bir qola medalmen oraldy,
dep habarlaıdy QazAqparat.
Sáýirdiń 29-y men mamyrdyń 9-y aralyǵynda ótken 7-shi Búkilálemdik bı olımpıadasyna 35 elden bıshiler kelgen. «Qobaljý, baqtalastyq qatty sezilip turdy. Polsha, Moldovo, Slovenııa ujymdary, Reseı komandalarynyń ózi qandaı bıik deńgeıde ekendigi belgili. Olardyń bıshileri úlken senimdilikpen, arttarynda talaı básekelerden alynǵan oljalary boldy. Sondyqtan Qazaqstannan kelgen, eshkimge belgisiz toptyń sheberlik jaǵynan asyp túsetinderin olar kútken joq edi. Jarys nátıjeleri sońyna deıin jarııa etilmedi. Jeńimpazdar sońyna deıin belgisiz bolyp keldi. Birinshi oryndy Qazaqstan ıelengendigin aıtqan kezde kópshiligi tań qalysty», deıdi «Qazirgi zamanǵy jáne sporttyq bıleri federatsııasynyń» prezıdenti, olımpıadanyń qazysy Álııa Túsipbekova.
«Alekseı Velıjanınniń bı teatry» «balet» atalymy boıynsha qyzdar arasynda birinshi oryndy ıelense, erler arasyndaǵy jarysta kúmis alqany oljalady. Taǵy bir kúmis medal «modern» atalymynda alyndy. «Bı shoýy» atalymynyń dýettyq synynda da qazaqstandyq teatr órenderi kózge túsip úshinshi oryndy jeńip aldy.
«Alekseı Velıjanınniń bı teatry» Astanada 5 jyl buryn qurylǵan. Az ýaqyttyń ishinde sheberlikterin shyńdap úlgergen ujym halyqaralyq jarystarda júldemen oralyp júr.
«Myqtylardyń ishinde Qazaqstan úzdik dep tanylǵan kezde zaldaǵy barlyq adamdar úlken qoshametpen qarsy aldy. Kórermendermen qatar 35 eldiń bı ártisteri turyp qol shapalaqtaǵanda biz úshin budan asqan joǵary mártebe bolǵan joq», deıdi teatr jetekshisi Alekseı Velıjanın.
