Qazaqstandyq bıshi Sheshenstan basshysy Qadyrovtyń qolynan júlde aldy
«Aǵymdaǵy aptada Sheshen Respýblıkasynyń mádenıet mınıstrliginiń qoldaýymen Groznyı qalasynda áıgili bıshi, aty ańyzǵa aınalǵan Mahmýd Esambaev atyndaǵy IX Halyqaralyq bıshiler konkýrsy ótti. Atalmysh konkýrsta 16 eldiń ókilderi ónerlerin pash etti. Qazaqstan Respýblıkasynyń atynan QR Mádenıet jáne sport mınıstrliginiń qoldaýymen «Saltanat» bı ansambliniń beldi artısi Ernur Qaryqbol qatysty. Ernur Qaryqbol jeke bı nomınatsııasynda «Mońǵol» jáne «Aqqý» bılerin oryndady. Shet elderden kelgen oryndaýshylardyń sheberligine qaramastan, ol óte joǵary kásibı tehnıkalyq deńgeıde oryndaýymen erekshe ádilqazylardyń kózine tústi. Osylaısha, Ernur Qaryqbol Mahmýd Esambaev atyndaǵy IX Halyqaralyq bıshiler festıval-konkýrstyń Gran-Prı júldegeri atandy», - delingen Mádenıet jáne sport mınıstrligi málimetinde.
Júldeni Sheshen Respýblıkasynyń Prezıdenti Qadyrov Ramzan Ahmatuly óz qolymen tabystady. Konkýrstyń saltanatty jabylý rásimi Ernur Qaryqboldyń oryndaýyndaǵy «Mońǵol» bıimen aıaqtaldy.
Ernur Qaryqbol QR «Saltanat» bı ansambliniń kórkemdik jetekshisi-bas baletmeıster, «Qurmet» jáne «Parasat» ordenderiniń ıegeri, QR eńbek sińirgen qaıratker Gúlsáýle Orýmbaevanyń shákirti. Atalǵan júldeler jáne ádil-qazylardyń sheshimi ustazdyń halyqaralyq dárejedegi joǵary baǵasy bolyp tabylady.
