Qazaqstandyq birneshe sportshy dopıng úshin sporttan shettetildi
ASTANA. QazAqparat – Tokıodaǵy 2020 jylǵy Olımpıada oıyndarynyń qola júldegeri Igor Son 8 jylǵa sporttan shettetildi. Sondaı-aq qazaqstandyq aýyr atletter men jeńil atletter jáne taekvondo sheberi Jasúrbek Israılov jarystarǵa qatysa almaıdy, dep habarlaıdy QazAqparat Qazaqstannyń Ulttyq dopıngke qarsy ortalyǵynyń saıtyna silteme jasap.
Tokıoda 2020 jyly ótken Olımpıada oıyndarynyń qola júldegeri Igor Sonnan metasteron synamasy tabyldy, sonyń saldarynan ol 8 jylǵa sporttan tys qaldy. Metasteron úshin aýyr atletter Alekseı Drozdov, Ablaı Áýelhanov, ıÝlııa Potassova, Rýfına Chalkarova da 2026 jyldyń 28 naýryzyna deıin jarystarǵa qatysa almaıdy. Sondaı-aq taǵy bir aýyr atlet Karına Júnisbaeva kanrenon synmasy úshin 2024 jyldyń 21 qazanyna deıin sporttan shettetilgen edi. Jeńil atletter Aleksandr Savgýrov pen Ekaterına Grıtsaı oksaladron úshin 2025 jyldyń 26-shy qazanyna deıin sporttan shettetildi. Al taekvondo sheberi Jasúrbek Israılovtan meldonıı synamasy tabylyp, 2025 jyldyń 18-shi qarashasyna deıin sporttan tys qaldy.
Qazaqstandyq aýyr atletter osyǵan deıin de dopıng qoldanǵany úshin Olımpıada oıyndarynyń medaldarynan aıyrylyp qalyp edi.
Aıta keteıik, Tokıo Olımpıadasynda qazaqstandyq aýyr atlet, 2020 jylǵy Tokıoda ótken Olımpıada oıyndarynyń qola júldegeri Igor Son 61 kelige deıingi salmaq boıynsha qola medaldi jáne 2019 jylǵy álem chempıonatynyń kúmis júldesin enshilegen edi. 24 jastaǵy Igor Son óz karerasynda osyndaı jaǵdaıǵa ekinshi ret tap bolyp otyr.
2015 jyly qazaqstandyq aýyr atlet jasóspirimder arasyndaǵy álem chempıonatynan soń birneshe aıǵa sporttan shettetilgen bolatyn. Ol kezde sportshy preparattyń organızmine bıoqaldyqtar arqyly kirgenin dáleldegen edi.
Foto: sports.kz
