Qazaqstandyq bıotehnologtar úzdik tehnologııalaryn tanystyrdy
ASTANA. QazAqparat - Astanadaǵy Ulttyq bıotehnologııalyq ortalyǵynyń mamandary sándik jáne densaýlyq salasynda ashqan jańalyqtary men jasaǵan kommertsııalyq ónimderin tanystyrdy, dep habarlaıdy «QazAqparat» HAA tilshisi.
Atap aıtqanda, ortalyqtyń mamandary fıbroblasttardyń qoldanylýyna negizdelgen SPRS-terapııa, trombotsıttik plazmalar arqyly adam terisiniń jazylýyna arnalǵan PRP-terapııa, ınnovatsııalyq turǵyda jasýshalyq jasartý ádisi, densaýlyqtyń genetıkalyq qujaty sekildi zamannyń ozyq tehnologııalaryn pash etti. Mamandardyń aıtýynsha, jasýshalyq tehnologııalardy jasaýdyń estetıkalyq medıtsınada suranysy zor. Ol qazirgi medıtsınada ota jasaýdyń aldyn alady.
Medıtsınadaǵy taǵy bir jetistiktiń biri - densaýlyqtyń medıtsınalyq qujaty bolyp otyr. Jeke genetıkalyq qujatta klıenttiń saraptamalarǵa negizdelgen densaýlyq jaǵdaıy týraly aqparat saqtalady. Mundaı qujattyń bolýy adamdardyń salaýatty ómir saltyn ustanyp, túrli aýrýlardy alǵashqy satysynda emdeýge múmkindik bermek.
«Eger óz elimizde múmkindik bolsa, nelikten basqa memleketke baryp ol qyzmetti nemese ónimdi aqyly túrde alýymyz kerek. Búgingi kúni biz bul stereotıpti buzyp, Qazaqstanda da úzdik tehnologııalar bar ekenin dáleldegimiz keledi. Máselen, bir ǵana kosmetologııa salasynda biz sheteldik preparattardy qoldanýdy dástúrge aınaldyrǵanymyz da shyndyq. Al búgingi tańda bizdiń ǵylym bul salada birqatar jetistikterge jetkenin atap ótý kerek. Bizdiń kosmetologtar otandyq ǵalymdardyń qolynan shyqqan eń úzdik tehnologııalar arqyly kosmetologııa ónimderin shyǵaryp jatyr», - deıdi Ulttyq bıotehnologııa ortalyǵynyń dırektory Erlan Ramanqulov.
