Qazaqstandyq bılıardshylar Eýropa chempıonatyna qatysady
ALMATY. 13 mamyr. QazAqparat -16-20 mamyr kúnderi Reseıdiń Dondaǵy Rostov qalasynda bılıardtyń «Erkin pıramıda» túrinen erler jáne áıelder arasyndaǵy Eýropa chempıonaty ótedi.
Ony Búkilálemdik bılıard sporty konfederatsııasy aıasynda Pıramıda boıynsha Halyqaralyq jáne Eýropalyq komıtetter men Reseı bılıard federatsııasy uıymdastyryp otyr. Jarystyń jalpy júlde qory 27 myń dollardy quraıdy. Oǵan halyqaralyq dárejedegi tóreshi Aleksandr Kokýnın bastaǵan qazylar alqasy tórelik jasamaq.
Baıraqty básekede kvota boıynsha Qazaqstan, Reseı, Belarýs, Ýkraına elderi er sportshylardan - 5, áıelderden - 3, Moldova, Ázirbaıjan, Armenııa, Lıtva, Latvııa, Estonııa, Fınlıandııa erlerden - 4, áıelderden -2 sportshyny jibere alady.
Budan bólek, alys shet elderden er sportshylardan - 20, áıelderden -10 bılıardshy qatysady. Oǵan jarys qojaıyny retinde reseılikter erler men áıelder arasynda qosymsha bir-bir sportshy qosa alady. Onda bozbalalar men boıjetkender arasyndaǵy 2011 jylǵy Álem chempıonatynyń, 2012 jylǵy Eýropa chempıonatynyń fınalısteri, Álem kýbogy reıtınginde erlerden - 32, áıelderden -16 úzdiktiń arasyna engender, 2012 jylǵy Tatarstan Prezıdenti, Kemerov oblysy gýbernatory, 2011 jylǵy Ýlıanov oblysy gýbernatory, «Kreml kýbogy», Mının men Pojarsk kýbogy týrnırleriniń jeńimpazdary men júldegerleri ózara kúsh synaspaq.
