Qazaqstandyq bıatlonshy Reseıdiń namysyn qorǵaýdy sheshti
ASTANA. QazAqparat - Bıatlonnan jastar arasyndaǵy álem chempıonatynyń jeńimpazy, jasóspirimder arasyndaǵy olımpıadalyq oıyndardyń qola júldegeri - qazaqstandyq bıatlonshy Arına Pantova sporttyq azamattyǵyn aýystyrý sheshimin qabyldap, kelesi maýsymnan bastap Reseıdiń namysyn qorǵaıtyn bolady, dep habarlaıdy QazAqparat Sports.kz saıtyna silteme jasap.
Bul týraly 18 jastaǵy sportshy qyz Instagramdaǵy paraqshasyna jazdy.
«Menińshe, mán-jaıdy azdap túsindirip ótsem, bul bolyp jatqan jaǵdaıǵa keri áserin tıgizbes. Meniń aýysýym aqshamen esh baılanysty emes! Aıaq astynan qabyldanǵan bul sheshimniń qarapaıym túsinigi bar. Ákem bul jerge jumys isteýge shaqyryldy. Bar bolǵany osy. Munda básekeniń kóp bolǵany, kerisinshe, paıdaly. Júgirý qyzyqtyraq bolady. Al Qazaqstandy árdaıym jaqsy kórgenmin jáne solaı bolyp qala beredi! Jáne oǵan qatysty eshqashan eshteńe aıtqan emespin», - dep jazdy Pantova.
Aıta keteıik, Arına bıatlonnan qazaqstandyq bapker Dmıtrıı Pantovtyń qyzy.
