Qazaqstandyq bes sýretshiniń týyndysy Londonda bássaýdaǵa shyǵarylmaq
ASTANA. 25 aqpan. QazAqparat - Qazaqstandyq bes sýretshiniń týyndysy naýryz aıynda Londondaǵy Sotheby's bássaýda úıiniń kórmesine qoıylmaq.
Qazaqstandyq sýretshilerdiń eńbekteri bul bássaýdaǵa tuńǵysh ret shyǵady, dep habarlaıdy «Azattyq».
Álemdegi eń kóne aýktsıon úıleriniń biri Sotheby's 2013 jyly naýryzdyń 4-i men 12-i kúnderi aralyǵynda Londonda Ortalyq Azııa men Kavkaz elderiniń qazirgi óner týyndylarynyń «At The Crossroads» («Jolaıryqta») dep atalatyn kórme-satylymyn ótkizedi.
Armenııa, Ázerbaıjan, Grýzııa, Qazaqstan, Qyrǵyzstan, Tájikstan jáne Ózbekstan sýretshileriniń 50-ge jýyq kartınasy qoıylatyn kórmeni uıymdastyrýshylardyń habarlaýynsha, bul aımaqtyń beıneleý óneri tuńǵysh ret keń aýqymda tanystyrylmaq.
