Qazaqstandyq bes aýyr atlet Las-Vegasta ótetin Álem chempıonatyna attandy
ASTANA. QazAqparat - Naýryz aıynyń 8-15 aralyǵynda Las-Vegasta aýyr atletıkadan jastar arasyndaǵy Álem chempıonaty ótedi. Atalmysh birinshilikte el namysyn bes qazaqstandyq sportshy qorǵamaq, dep habarlaıdy QazAqparat tilshisi.
Qazaqstan aýyr atletıka federatsııasynyń baspasóz qyzmetinen habarlanǵandaı, chempıonatqa álemniń 50 elinen 13-17 jas aralyǵyndaǵy aýyr atletter ózara baq synaıdy. Qazaqstannyń namysyn Amerıkada Aqmolda Saıramkez (61 kelige deıingi salmaq), Saıhan Taısýev (67 kelige deıingi salmaqta), Sápı Esengeldi (81 kelige deıingi salmaqta), Rahat Bekbolat (96 kelige deıingi salmaqta) jáne Olga Pastýhova (81 kelige deıingi salmaqta) qorǵaıdy.
«Álem chempıonatyna qaýyrt daıyndyqty osy jyldyń qańtar aıynan bastap ketkenbiz. Jas sportshylarymyz Túrkııa men Almaty oblysynyń sporttyq bazalarynda eki birdeı oqý-jattyǵý jıynynan ótti. Eń myqty degen bes sportshyny tańdap aldyq. Sańlaqtarymyzdyń baby jaqsy. Bári daıyn. Ásirese, Saıhan Taısýev pen Olga Pastýhovada úshtikke ilinetindeı barlyq múmkindik bar», - deıdi jastar quramasynyń bas bapkeri Baqyt Ahmetov.
