Qazaqstandyq beldi sportshylardyń jeke zattary qoıylǵan kórme ashyldy
ASTANA. QazAqparat - Búgin QR Tuńǵysh Prezıdenti mýzeıinde elimizdiń táýelsizdigi jyldaryndaǵy qazaqstandyq sporttyń tarıhynan syr shertetin "Olımpıadalyq qozǵalys" ekspozıtsııasy ashyldy, dep habarlaıdy QazAqparat tilshisi.
Kórmeniń ashylýyna QR UOK Bas hatshysy Danııar Abylǵazın, sonymen qatar Jaqsylyq Úshkempirov, Baqtııar Artaev, Gýzel Manıýrova sııaqty tanymal sportshylar qatysty. Shara barysynda aty atalǵan sportshylardyń, sondaı-aq, ózge de tanymal qazaqstandyq sportshylardyń jeke zattary kórmege qoıyldy.
«Osy kórmege Qazaqstan sportynyń jetistikterinen syr shertetin jádigerler qoıylǵan. Bizdiń ardagerler men sportshylarymyzdyń jeńisteri jas urpaqty bıik shyńdardy baǵyndyrýǵa jetelep júr», - dedi QR UOK Bas hatshysy Danııar Abylǵazın.
Endi aldaǵy kúnderi kórmege kelýshiler sport ardagerleri men UOK prezıdentteriniń jeke zattaryn tamashalaýǵa múmkindik alady. Ekspozıtsııada táýelsiz Qazaqstan sportshylary qatysqan árbir Olımpıada oıyndary týraly maǵlumat usynylǵan.
«25 jyl ishinde táýelsiz Qazaqstan zor sporttyq jetistikterge jetti. Sol tarıhpen osy jerde tanysýǵa bolady. Olımpıada oıyndarynyń jarqyn sátterin taǵy bir márte eske túsirýge múmkindik bergen Olımpıadalyq komıtetke alǵysymyz sheksiz. Astanalyqtarǵa, ásirese, bolashaq chempıondar - balalarǵa qyzyqty bolatynyna senimdimin», - dedi Gýzel Manıýrova shara barysynda.
Aıta keteıik, osylaısha búginnen bastap QR UOK mereıtoıyna arnalǵan is-sharalar bastalyp ketti. 17 naýryzda sport ardagerleri, olımpıadashylar men sheteldik qonaqtardyń qatysýymen saltanatty kontsert ótpek. Kórme 2017 jyldyń 2 mamyryna deıin jumys isteıdi.
