Qazaqstandyq baılanys operatorlary men hostıng-provaıderleri «Qaýipsiz ınternet týraly» deklaratsııa qabyldady
ALMATY. Maýsymnyń 22-si. QazAqparat /Erlik Erjanuly/ - Búgin Almatyda Qazaqstannyń ınternet qaýymdastyǵynyń bastamasymen baılanys operatorlary men hostıng-provaıderleri «Qaýipsiz ınternet týraly» deklaratsııaǵa qol qoıdy,
dep habarlaıdy QazAqparat.
«Qazaqstan ınternet qaýymdastyǵy» zańdy tulǵalar birlestiginiń prezıdenti Shavkat Sabyrovtyń aıtýynsha, bul deklaratsııanyń basty maqsaty aqparattyq-kommýnıkatsııalyq tehnologııalar salasyndaǵy senim sharalaryn kóterýge áser etý. Sondaı-aq barlyq paıdalanýshylar úshin qaýipsiz jáne bıznes múddelerin eskeretin aqparattyq orta retinde ǵalamtor jelisiniń ulttyq segmentin damytýǵa atsalysý. Óıtkeni qazirgi tańda ǵalamtor arqyly kompıýterlik vırýstar, elektrondyq alaıaqtyq, balalar pornografııasy men taǵy basqa da zorlyq-zombylyqtardy taratý máselesi asqynyp tur.
«Búginderi jelide pornografııanyń gúldený máselesi ózekti bolyp tur. Sondaı-aq sońǵy kezde vırýstyq belsendilik baıqalyp, elektrondyq alaıaqtyq jıiledi. Deklaratsııada bıznestiń qoǵam aldyndaǵy áleýmettik jaýapkershiligin jáne ǵalamtor jelisin paıdalaný salalaryn keńeıtýdiń gýmanıtarlyq mańyzy eskerilgen. Ol ınternettiń qııanatshyl paıdalanýshylarynyń jolynda ashyq, yqpaldy mehanızm qurýǵa jáne baılanys kompanııalary men hostıng-provaıderlerdiń ınternet-qoǵamdastyqtarmen ózara qarym-qatynas tıimdiligin arttyrýǵa baǵyttalyp otyr. Deklaratsııa naryqtyń basqa qatysýshylarynyń qol qoıýy úshin ashyq», deıdi «Nursat» AQ-nyń dırektory Nurlan Izmaılov.
