QAZAQSTANDYQ BATYRLAR: Musabek Seńgirbaev

ASTANA. QazAqparat - Musabek Seńgirbaev 1917 jyly naýryzdyń 17-i kúni Almaty oblysy, Kóksý aýdany, Qyzylaryq aýylynda dúnıege kelip, 1941 jyly qarashanyń 16-ynda Máskeý oblysy, Volokolam aýdany, Dýbosekovo derevnıasynda qaza tapty. Ekinshi dúnıejúzilik soǵysqa qatysýshy, qazaq. Keńes Odaǵynyń batyry.

1941 jylǵa deıin ujymsharda traktor júrgizýshisi bolyp jumys istegen. 1941 jyly Keńes áskeri qataryna alyndy. Osy jyldyń 16 qarashasynda Seńgirbaev Dýbosekovo temir joly aıyrmasynda tankige qarsy shaıqasatyn toptyń quramynda jaýdyń birneshe shabýylyn toıtarýǵa jáne 18 tankisin joıýǵa qatysty. Bul erlik tarıhta 28 batyr-panfılovshylar erligi degen atpen qaldy. Osy shaıqasta Seńgirbaev erlikpen qaza tapty. Volokolam aýdany, Nelıdovo derevnıasyndaǵy baýyrlastar zıratyna jerlengen.

KSRO Joǵarǵy Keńesi Tóralqasynyń Jarlyǵymen Seńgirbaevqa Keńes Odaǵynyń Batyry ataǵy, Lenın ordeni jáne «Altyn Juldyz» medali berildi (21.7.1942). Almaty oblysy, Kóksý aýdany, Balpyq bı kentindegi saıabaq pen bir kóshege Seńgirbaev esimi berilip, bıýst ornatylǵan. Týǵan jerindegi aýyl men mektepke esimi berilgen. Olardyń kurmetine 1975 jyly Dýbosekovoda memorıal, Nelıdovo derevnıasynda (Dýbosekovo temir joly aıyrmasynan 1,5 shaqyrym jerde) batyr-panfılovshylarǵa eskertkish ornatylyp, murajaı ashyldy. Almaty qalasynda 28 gvardııashy-panfılovshylar atyndaǵy saıabaq bar, onda olarǵa arnalyp monýment qoıylǵan jáne bir kóshege Seńgirbaev esimi berilgen.