QAZAQSTANDYQ BATYRLAR: Ivan Panfılov
Ol 1893 jyly 1 qańtarda Saratov oblysyndaǵy Petrovsk qalasynda dúnıege kelgen. 12 jasynan jaldamaly jumysqa jegilip, 1915 jyly patsha armııasyna alyndy. Sol jyly orys-nemis maıdanyna jiberildi.
Qyzyl Armııa qataryna 1918 jyly óz erkimen kirdi. 25-shi Chapaev dıvızııasynyń 1-shi Saratov jaıaý áskerler polkyna qabyldandy. Azamat soǵysyna qatysty, Dýtovqa, Kolchakqa, Denıkınge jáne aq polıaktarǵa qarsy shaıqasty. Azamat soǵysynan keıin ekijyldyq Kıev jaıaý ásker mektebin bitirip, Ortalyq Azııa áskerı okrýgine joldama aldy, osynda júrip, basmashylarmen kúreske qatysty.
Uly Otan soǵysyn general-maıor I.V.Panfılov Qyrǵyz KSR áskerı komıssary qyzmetinde júrgende qarsy aldy. 1941 jyly Almaty qalasynda jergilikti ult ókilderinen 316-shi atqyshtar dıvızııasyn quryp, soǵysqa attandy. 1941 jyldyń qazan-qarasha aılarynda Máskeý túbindegi qorǵanys kezinde Panfılov basqarǵan 316-atqyshtar dıvızııasynyń jaýyngerleri Volokolamsk baǵytyn qorǵaýda asqan erlik kórsetti. Máskeýdi qorǵaýda Panfılov basqarǵan dıvızııanyń batalon komandıri, qazaq halqynyń erjúrek uly Baýyrjan Momyshulynyń, jıyrma segiz panfılovshy-batyrlardyń dańqy shyqty.
«Urystyń eń qıyn jaǵdaılarynda da Panfılov bólimderdi basqara otyryp, parasatty basshylyq etti. Úzdiksiz aılap, Máskeý túbinde urys salǵan dıvızııa bólimderi ózderiniń pozıtsııalaryn ustap turýmen qatar, joıqyn qarsy shabýyldarǵa shyǵyp, jaýdyń 2-shi tank dıvızııasyn, 29-shy motorly, 11-shi jáne 110-shy jaıaý áskerler dıvızııalaryn talqandady, 9000 jaý áskeri men ofıtserlerin, 80-nen astam tankin, kóptegen soǵys quraldary men mınometterin joıdy», - dep jazdy Batys maıdanynyń qolbasshysy, armııa generaly G.K.Jýkov Joǵarǵy bas qolbasshynyń Stavkasyna.
Qolbasshylyqtyń jaýyngerlik tapsyrmalaryn úlgili oryndap, jappaı erlik pen batyrlyqtyń úlgisin kórsetkeni úshin 316-shy dıvızııa 1941 jylǵy 17 qarashada Qyzyl Tý ordenimen marapattaldy, al kelesi kúni 8-shi gvardııalyq atqyshtar dıvızııasy ataǵyna ıe boldy. General-maıor I.V.Panfılov 1941 jyly 18 qarashada Volokolamsk túbinde urys kezinde alǵan aýyr jaraqattarynan qaıtys boldy, onyń súıegi Máskeýdegi Novodevıche beıitine áskerı qurmetpen jerlendi. Ivan Vasılevıch Panfılovqa Keńes Odaǵynyń Batyry ataǵy Máskeý túbindegi urystarda dıvızııa bólimderine sheber basshylyq jasaı otyryp, óz basynyń jekeleı erlik pen batyrlyq kórsetkeni úshin qaıtys bolǵannan keıin 1942 jylǵy 12 sáýirde berildi.
Keńes Odaǵynyń Batyry I.V.Panfılov Lenın, úsh márte Qyzyl Tý ordenderimen, «Jumysshy-sharýa Qyzyl áskerine 20 jyl» medalimen marapattalǵan. Almaty oblysynyń bir aýdany, Almaty qalasyndaǵy kóshe I.V.Panfılov esimimen atalady, Almatyda 28-gvardııashy-panfılovshylar atyndaǵy park bar, onda batyr-generalǵa eskertkish ornatylǵan.
Ataqty qolbasshynyń ómiri men qyzmeti jóninde B.Momyshulynyń «General Panfılov», «Bizdiń general», F.Selıfanovtyń «Panfılovshylar», P.Kýznetsovtyń «Keńes Odaǵynyń Batyry I.V.Panfılov» , A.Ýsenovtiń «Biz panfılovshylarmyz» degen kitaptary jaryq kórdi.
Jaqynda Qazaqstan halqy Assambleıasynyń HHІ sessııasynda sóılegen sózinde Elbasy Nursultan Nazarbaev Uly Jeńistiń 70 jyldyǵyna oraı elordada general I.V.Panfılovqa eskertkish ornatý jóninde tapsyrma berdi.
