Qazaqstandyq basketbolshylar Malaızııadaǵy Azııa chempıonatynda 9-shy orynǵa ıe boldy
ALMATY. Qarashanyń 27-si. QazAqparat /Erlik Erjanuly/ - Basketboldan Malaızııanyń Djohor-Bahrý qalasynda 16 jasqa deıingi jasóspirimder arasynda ótip jatqan Azııa chempıonatynda qazaqstandyqtar búgin Úndistan quramasynan basym tústi,
dep habarlaıdy QazAqparat.
9-10-ynshy oryndar úshin bul oıynda Borıs Borısovtyń shákirtteri qarsylastaryn 59:49 esebimen utty. Úndistan quramasy irikteý kezeńinde Iordanııa (57:31) men Qytaıdan (121:47) utylyp, Saýd Arabııasyndaǵy qurdastarynan ǵana 55:41 esebimen basym tústi. Sondaı-aq shırek fınalda Sıngapýr (65:51) men Bahreın (58:40) sportshylaryn utqanmen, taılandtyqtarǵa (55:52) ese jiberip aldy. Al qazaqstandyqtar irikteý kezeńinde Bahreındi (63:54) utqanmen, Fılıpın (76:50) men Japonııadan (78:66) utyldy. Shırek fınalda Malaızııa (75:59) men Saýd Arabııasynan (64:38) basym túskenmen Kýáıtten kelgen sportshylarǵa (66:63) jol berip qoıdy. Sol sebepti júldeli oryndarǵa talasý múmkindigine aırylǵan qos komanda 9-10-ynshy oryndardy ǵana sarapqa saldy. Búgingi aqtyq fınalda 11-12 oryn úshin ótken saıysta malaızııalyqtar Bahreın quramasyn (83:73), al 7-8 oryn úshin bolǵan kezdesýde sırııalyqtar Iordanııa quramasyn (87:51) utty. Endi Taıpeı men Japonııa úzdik bestiktiń qataryna kirý úshin, Fılıppın men Iran 3-4-inshi oryn, al Qytaı men Koreıa Azııa chempıony ataǵy úshin baq synasatyn bolady.
