Qazaqstandyq basketbolshy jigitter Azııa chempıonatynda Qytaı sportshylarymen kúsh synasýda
ALMATY. 5 tamyz. QazAqparat - Basketboldan erler arasynda Fılıppın eliniń Manıla jáne Pasaı qalalarynda ótip jatqan XXVII Azııa chempıonatynda búgin ekinshi toptyq kezeńniń saıystary ótip jatyr. Onda Qazaqstan men Qytaı, Malaızııa men Taıland, Fılıppın men Japonııa, Ońtústik Koreıa men Bahreın sportshylary ózara kúsh synaspaq. Birinshi tamyz kúni jalaýyn kótergen bul baıraqty básekeniń alǵashqy toptyq kezeńinde ıtalıandyq Matteo Bonıchıollı jattyqtyratyn el quramasy «D» tobynda úzdik shyqqan bolatyn. Olar taılandtyqtardy 81:67, bahreındikterdi 79:76, úndistandyqtardy 80:67 esebimen utqan edi.
Azııa chempıonatynda 15 dúrkin chempıon atanǵan Qytaı quramasy 2 jyl buryn óz elinde ótken sońǵy Azııa chempıonatynda jeńimpaz atanǵan bolatyn. Qazir aspan asty eliniń basketbolshylary álemdik reıtıngte 11-inshi satyda tur. Al álemdik reıtıngte 47-shi orynda turǵan Qazaqstan quramasynyń Azııa chempıonatyndaǵy eń joǵarǵy nátıjesi 2007 jyly qol jetkizgen tórtinshi oryn bolyp otyr. Al Álem chempıonaty jáne Olımpıada oıyndaryna osy ýaqytqa deıin birde-bir ret qatysqan joq.
