Qazaqstandyq barlaýshylar úzdik atandy (FOTO)
Belarýs, Qytaı, Reseı, Amerıka Qurama Shtattary jáne Qazaqstan elderinen kelgen barlaýshylar bes kún boıy arnaıy maqsattaǵy tańdaýly bólimshelerdiń is-qımyl mashyqtaryn kórsetti. Qatysýshylar ondaǵan shaqyrym jerden ótý, kúndizgi jáne túngi ýaqytta aýysa otyryp qolaısyz jaǵdaıda túrli nysanalardy atý, medıtsınalyq jáne taý daıarlyǵy, kedergi syzyqtaryn ıgerý, 30 shaqyrymǵa sherý jasaý, shym-shytyryq qıylysqan jerlerdi baǵdarlaý, jasandy qoparǵysh mına isi jáne basqa da arnaıy is-sharalardy oryndady. Qajyrly jáne qyzý kúreste qatysýshylar ózderiniń álsiz jáne pármendi tustaryn aıqyndap qana qoımaı, sonymen qosa arnaıy operatsııalardy, arnaıy maqsattaǵy barlaý toptarynyń jaýyngerlik ádistemelik daıarlyǵyn júrgizýde tájirıbe almasyp, dostar tapty. «Meniń oıymsha bizdiń top eń tájirıbeli top. Olar tutastaı Taıaý Shyǵystaǵy jáne Aýǵanstandaǵy operatsııalarǵa qatysty. Biz úshin eń kúrdelisi taktıka bolatyn. Daıarlyq bizde múlde basqasha eken. Degenmen saıys maqsaty tájirıbe almasý bolyp otyr. Sondyqtan da biz bul jerde kóp dostar taptyq» - dep AQSh «Jasyl beretter» tobyndaǵy jaýyngerleriniń biri Maıkl Braýn atap ótti. Saıystyń qorytyndysy boıynsha Qorǵanys mınıstrliginiń basshylyǵy jeńimpazdarǵa júldeler men syılyqtar tabys etti. «Altyn úki - 2015» saıysynyń altyn kýbogyn Qazaqstandyq arnaıy maqsattaǵy bólimsheler jeńip aldy, kúmis júlde - Kún asty eliniń jaýyngerlerine buıyrdy. Sonymen qatar qytaılyq áskerı qyzmetshiler «Úzdik mergen jup» nomınatsııasy boıynsha jeńiske jetti. Úshinshi oryndy eki top ıelendi, olar - Reseı Federatsııasy men Belorýs Respýblıkasynyń desantshylary. «Jeńiske degen jigerligi úshin» gramotasymen jaraly aıaǵymen soqpaq joldan ótken belorýstyq áskerı qyzmetshisi nagradtaldy. Al amerıkalyq «Jasyl beretter» toby «Úzdik qoparǵyshtar» nomınatsııasyn jeńip alyp, top boıynsha «Jeńiske degen jigerligi úshin» gramotasyn ıelendi. Olar jasandy qoparǵysh mınaisi jáne 10 shaqyrymdyq sherý jasaý boıynsha kezeńderdiń birinde óz sheberlikteri men jeńiske degen qulshynysyn kórsetti. Qatysýshylardyń kózqarasy boıynsha jarys aıtarlyqtaı kúrdeli boldy. Ár kezeń shydamdylyqtyń, kúshtiń, toppen sapaly jumys jasaýdyń joǵary deńgeıin jáne ár qatysýshynyń babyndaǵy daıarlyǵyn talap etti. Ár komanda úshin aýa raıy erekshe mańyzdy sanaldy. Qapyryq kún jáne qurǵaq klımat tipti eń tájirıbeli jáne myqty degen arnaıy maqsattaǵylardyń josparyna birneshe márte kedergi boldy.