Qazaqstandyq bapker Qanat Islamnyń Brendon Kýkke qarsy múmkindikterine baǵa berdi
ASTANA. QazAqparat - Qazaqstan quramasy tarıhyndaǵy eń tabysty bapkerlerdiń biri Tursynǵalı Edilov Qanat Islamnyń Brendon Kýkpen jekpe-jegi qarsańynda qazaqstandyq sportshy týraly óz pikirin bildirdi, dep habarlaıdy «QazAqparat» HAA tilshisi.
«Brendon Kýk osal boksshy emes, ony jete baǵalamaýǵa bolmaıdy. Qanat Islamnyń ókilderi kásibı rıngte jeńilip kórmegen naǵyz myqty qarsylasty tańdaǵan eken. Buǵan deıin Kýk on segiz kezdesý ótkizgen jáne barlyǵynda jeńiske jetken. Sózsiz, qurmetke laıyq sportshy. Onyń ústinde, aıqastyń Qazaqstanda ótýi de Qanat Islamǵa úlken jaýapkershilik artyp otyr», - deıdi Edilov.
«Óz sharshy alańyńda jankúıerlerdiń sheksiz qoldaýyna ıe bolyp qana qoımaısyń, erekshe qobaljı túsesiń, - dep jalǵastyrdy ol. - Degenmen, Qanat Islam tájirıbeli boksshy, onda áýesqoı rıngtegi barlyq resmı týrnırlerdiń marapattary bar. Kásibı rıngtegi 24 kezdesýin de jeńispen aıaqtaǵan. Sondyqtan, bul joly Qanat kezekti ret óz sheberligi men tegeýrinin kórsetýi tıis».
Sonymen birge, bapker Qanat Islamnyń kásibı boksshy retindegi aldaǵy damý jolyna boljam jasap kórdi.
«Meniń oıymsha, Brendon Kýkpen bolǵan jekpe-jekten keıin Qanattyń aldynda jańa múmkindikterge jol ashylady. Árıne, kóp nárse onyń promoýterlerine baılanysty, Qanattyń ózi kúni erteń rıngke shyǵyp ketýge daıyn. Qanat Qazaqstanǵa alǵash kelgende, meniń jetekshiligimmen jattyqqan edi, sol sebepti onyń bar múmkindikteri maǵan aıan. Onyń joǵary kásibıligi men iske baıyppen qaraýy súısindiredi», - dep atap ótti Edilov.
Bapkerdiń aıtýynsha, Qanat Islamnyń ómirinde tanymal metsenat, kásipker Baýyrjan Ospanov mańyzdy ról atqarǵan. Metsenat áli kúnge deıin sportshyǵa qoldaý bildirip keledi.
«Baýyrjan Ospanov qazaqstandyq sporttyń, ásirese jekpe-jektiń úlken tabynýshysy. Ospanovtyń rýhanı jáne materıaldyq qoldaýynyń arqasynda kóptegen sportshylar sportpen aınalysyp, álemdik arenada elimizdi tanytýǵa yntalana tústi. Almaty oblystyq boks jáne kúres federatsııasynyń prezıdenti retinde Baýyrjan Keńesbekuly atalǵan sport túrlerin damytýda aýqymdy jumystar atqaryp keledi», - deıdi T.Edilov.
Eske sala ketsek, Edilovtiń jetekshiligimen qazaqstandyq boksshylar 2000 jyly Sıdneıde ótken Olımpıada oıyndarynan eki altyn jáne eki kúmis júldeler ákeldi.
9 qyrkúıek kúni «EKSPO-2017» halyqaralyq mamandandyrylǵan kórmesi aıasynda kásibı boks keshi ótedi. Qanat Islamnan bólek, boks keshinde Janqosh Turarov, Jánibek Álimhanuly, Alı Ahmedov, Meıirim Nursultanov, Rýslan Myrsataev, Dımash Nııazov, Aıdos Erbosynuly jáne Nursultan Janaıbaev rıngke shyǵady.
