Qazaqstandyq bapker bokstan Pákistan quramasyn jattyqtyratyn bolady
ASTANA. QazAqparat - Pákistan boks federatsııasynyń (PBF) baspasóz hatshysy Nasır Týng TheNews.com.pk-ǵa bergen suhbatynda quramanyń jańa bapkeri týraly aıtyp berdi, dep habarlaıdy Sports.kz.
Pákistannyń quramasyn qazaqstandyq bapkerdiń jattyqtyratyny belgili, alaıda Federatsııa basshylyǵy naqty kandıdatýrany ázirge anyqtamady. «Qazaqstanda boks jaqsy damyǵan, sondyqtan osy eldiń bapkerin jaldaýdy josparlap otyrmyz. Olar resmı saýal joldaýdy suraǵan bolatyn. Taıaý ýaqytta bizge resmı kelisim jiberip, maman tabýlary kerek», - dedi Týng.
PBF baspasóz hatshysy atap ótkendeı, bapkerdiń jalaqysy aıyna 2500 dollardy quraıdy, al kelisimshart úsh nemese tórt jylǵa jasalynady. Sondaı-aq, basylym pákistandyq boksshy Avaıs Alı Hannyń Qazaqstanda jattyǵý jıynyn ótkizetinin jazdy.
