Qazaqstandyq bankter máseleli qaryzdardyń kórsetkishin aıtarlyqtaı azaıtty
ASTANA. QazAqparat - Qazaqstandyq bankter máseleli qaryzdardyń kórsetkishin aıtarlyqtaı azaıtty. Bul týraly OKQ baspasóz máslıhatynda QR Ulttyq bankiniń tóraǵasy Qaırat Kelimbetov aıtty.
"Máseleli qaryzdar kórsetkishi aıtarlyqtaı azaıdy. Qazir 1 shildedegi kórsetkish boıynsha 13% qurap otyr. Esterińizge sala ketsek, 2013 jyldyń aıaǵynda jumys istemeıtin bank qaryzdarynyń somasy 31,2% nemese 4,2 trln. teńgeni quraǵan edi.
Ulttyq bank Elbasynyń tapsyrmasyna sáıkes, 2015 jyly banktiń máseleli qaryzyn 15 paıyzǵa, 2016 jyldyń 1 qańtaryna deıin 10 paıyzǵa deıin tómendetý úshin arnaıy salyqtyq zańdylyqqa ózgerister engizip, bankterdiń qaryzyn azaıtý maqsatynda Biregeı saıasat daıyndady. Máseleli qaryzdardy baǵalaý jáne ony azaıtý úshin Komıssııa qurdy, ol Komıssııada bankter ár 10 kún saıyn qaryzdyń aýqymyn azaıtý úshin ne jasalyp jatqany týraly habarlap, esep berip otyrady", - deıdi Kelimbetov. Onyń aıtýynsha, 2016 jyldyń 1 qańtaryna deıin bankter óz qorjynyndaǵy máseleli qaryzdy 10 paıyzǵa deıin azaıtýǵa mindetti. Eger de azaıtpasa, bankterdiń lıtsenzııasyn qaıtaryp alý, menedjmentin ózgertýge deıin is-sharalar jasalady. 2004-2009 jyldary ıpotekalyq qaryz alǵan azamattardyń qaryzyn qaıta qarjylandyrý boıynsha 130 mlrd teńge bólindi. Ol qarjy nesıeniń paıyzdyq ústemaqysyn 3 paıyzǵa deıin azaıtyp, tóleý merzimin 20 jylǵa deıin sozýǵa múmkindik beredi. "Ulttyq bank pen Úkimettiń is-sharalary bank júıesin saýyqtyryp qana qoımaı, eldegi nesıeleý jaǵdaıyn kádimgideı jaqsartady. Máseleli nesıelerden qutylǵan bankter memleketten uzaqmerzimdik qarjyǵa qol jetkizip, orta jáne shaǵyn bızneske, halyqqa nesıe bere bastaıdy", - dep atap ótti UB tóraǵasy.
