Qazaqstandyq bank órtten kóz jumǵandardyń nesıesin keshirip, otbasyna 3 mln teńgeden beredi

ASTANA. QazAqparat – Abaı oblysyndaǵy orman órti kezinde qaıtys bolǵan jandardyń otbasyna 3 mln teńge kóleminde qarjylyq qoldaý kórsetiledi, dep habarlaıdy QazAqparat.

«Abaı oblysyndaǵy órtti sóndirý kezinde qaza tapqandardyń otbasyna 3 mıllıon teńge beriledi. Halyk Bank órtte qaza tapqan orman sharýashylyǵy qyzmetkerleriniń otbasyna qarjylaı kómek jiberedi. Sonymen qatar órtte qaza tapqan azamattardyń jáne olardyń otbasy músheleriniń osy banktegi bar nesıesi esepten shyǵarylady», - delingen qarjy uıymy taratqan habarlamada.

Eske sala keteıik, búgin Memleket basshysy jaǵdaıdy baqylaý maqsatynda Abaı oblysyna bardy.

Aıta keteıik, Abaı oblysyndaǵy órtten kóz jumǵan ormanshylardyń tizimi jarııalandy.

Qazir Semeı ormanynda 1500 adam jáne 300-ge jýyq tehnıka bes ýchaskede órt sóndirip jatyr.