Qazaqstandyq balýandar «Mońǵolııa Open» týrnırinde qos altyndy enshiledi
ASTANA. QazAqparat - Mońǵolııanyń Ulan-Batyr qalasynda erkin jáne áıelder kúresinen «Mońǵolııa Open» halyqaralyq týrnıri ótip jatyr. Jarystyń alǵashqy kúni Áset Serikbaev jattyqtyratyn erkin kúres balýandary qorjynymyzǵa 2 altyn, 1 kúmis, 1 qola medal saldy, dep habarlaıdy QazAqparat Qazaqstan Kúres federatsııasyna silteme jasap.
86 kılogramm salmaqta kúresken Ádilet Daýlambaev pen 97 kılogramdaǵy Baqdaýlet Álmentaı Mońǵolııa jerinde qarsylas shaq keltirmeı, óz salmaqtarynyń úzdigi atandy. 65 kelide kúresken Saıatbek Oqasovtyń enshisinde kúmis medal. 74 kelidegi Danııar Qaısanov qola júldeniń ıesi.
Aıta keteıik, Mońǵolııa astanasynda ótip jatqan halyqaralyq týrnırde jeńimpaz atanǵan balýandar 1000 AQSh dollary kóleminde syıaqy alsa, kúmis júldegerge 800 AQSh dolary berildi. Qola júldege ıe bolǵan balýan 500 AQSh dollary kóleminde syıaqy aldy.
