Qazaqstandyq balýandar Bolgarııadaǵy týrnırde úsh qola júlde jeńip aldy
ASTANA. QazAqparat - Bolgarııada kúres túrlerinen «Dan Kolov-Nıkola Petrov» halyqaralyq týrnıriniń sońǵy jarys kúni ótýde. Qazaqstan qorjyny kezekti qola júldemen tolyqty, dep habarlaıdy Olympic.kz.
Áıelder kúresinen 76 kelige deıingi salmaqta qazaqstandyq Elmıra Syzdyqova qola júldeger atandy. Kishi fınalda ol norvegııalyq qarsylasynan basym tústi.
Grek-rım kúresinen 67 kelige deıingi salmaqtaǵy Meıirjan Shermahambet pen 77 kelidegi Temirlan Shadýkaev ta týrnırdiń qola júldegerleri qatarynda. Meıirjan reseılik Alekseı Kııankındi 7:1, Temirlan qyrǵyz balýany Qaıratbek Týgolbaevty 6:5 esebimen jeńdi.
Buǵan deıin erkin kúresten Nurıslam Sanaev týrnır jeńimpazy atansa, grek-rım kúresiniń ókili Qorlan Jaqanshv kúmis, Hýseın Mýltsogov pen Amanǵalı Bekbolatov qola júlde jeńip aldy.
Sondaı-aq, áıelder kúresinen Marııa Sedneva kúmis, Juldyz Eshimova qola medal ıegeri atandy.
