Qazaqstandyq balýandar Azııa birinshiliginiń alǵashqy kúninde 4 medal jeńip aldy
ASTANA. QazAqparat - Keshe Úndistannyń Nıý-Delı qalasynda ótip jatqan jastar arasyndaǵy kúres túrlerinen Azııa chempıonatyn qazaqstandyq balýandar sátti bastady, dep habarlaıdy QazAqparat tilshisi.
QR Kúres túrleri federatsııasynyń baspasóz qyzmeti málim etkendeı, «Saryqurlyq» dodasynyń alǵashqy kúni bozkilemge shyqqan grek-rım kúresiniń balýandary bes salmaqta jeńimpazdar men júldegerlerdi anyqtady. Jas balýandarymyz bul synda el qorjynyna tórt qola medal saldy.
55 keli salmaqta kúresken Arslan Abdýrahmanov jartylaı fınalda úndi balýanynan 10:15 esebimen jeńilip qaldy. Esesine, qola medal úshin bolǵan aıqasta japon balýanynan basym tústi. Tartysty ótken beldesý 8:7 esebimen Arslannyń paıdasyna sheshildi.
63 kelidegi Tilek Ásembaev shırek fınalda ırandyq balýannan utylǵanymen, qola medal úshin bolǵan beldesýde túrkimenstandyq balýannan 6:1 esebimen aılasyn asyrdy.
87 kelidegi Sanjar Temirbek pen 130 kelidegi Anton Savenko da Azııa chempıonatynyń qola medaline ıe boldy. Sanjar alǵashqy aınalymda 9:0 esebimen ózbek balýanyn jeńdi. Al jartylaı fınalda qytaı balýanynan 2:4 esebimen utyldy. Qola medal úshin bolǵan sheshýshi beldesýde qyrǵyz balýanyna esh múmkindik qaldyrǵan joq - 9:0.
Asa aýyr salmaqtaǵy Anton Savenko birinshi beldesýinde 1:2 esebimen Iran balýanyna utyldy. Biraq, qola medal úshin kúreste Qytaı balýanyn 8:0 esebimen jeńdi.
Jarystyń birinshi kúni sarapqa salynǵan bes salmaqtyń bas júldesine Iran men Úndistan balýandary ıe boldy. Irannyń jas balýandary 4 salmaqta (55, 63, 87, 130) top jarsa, Úndistanǵa 77 keli salmaqtyń bas júldesi buıyrdy. Ókinishke qaraı, bul salmaqta kúresken Daýlet Jalǵasov júldesiz qaldy.
Esterińizge sala keteıik, osyǵan deıin atalǵan dodada kúrestiń úsh túrinen 30 balýan el namysyn qorǵaıtyny týraly aıtqan bolatynbyz.
